Markmið

Við gerð verndaráætlunar Vatnajökulsþjóðgarðs fyrir austursvæði þjóðgarðsins árið 2010. Kom í ljós að ekki voru til tæmandi upplýsingar um fossa á svæðinu. Fossar hafa verndargildi sbr. 37. gr. laga um náttúruvernd (44/1999). Þekkt er að fossar hafa gjarnan aðdráttarafl fyrir ferðamenn vegna fegurðar og fjölbreytni, á öllum árstímum. Einnig að umhverfi fossa og lækja getur verið viðkvæmt og þolað illa ágang. Töluvert er af lækjum og ám á Austursvæði Vatnajökulsþjóðgarðs einkum við Snæfell og á Snæfellsöræfum, vitað er frá staðkunnugum um allmarga fossa þar. Margir fossanna eru nafnlausir og ekki nákvæmlega staðsettir eða til á þeim lýsingar. Markmið verkefnisins er að kortleggja, mynda og segja frá fossum á austursvæði Vatnajökulsþjóðgarðs þar sem lítið er til af gögnum um þá fjölmörgu fossa og læki sem má finna á svæðinu. Áætlað er að ganga að sem flestum fossum á austursvæði staðsetja þá með GPS tæki, taka af þeim mynd og gera stutta lýsingu. Úr þessum gögnum verður gerð fossaskrá sem verður aðgengileg á vefsíðu.